Pekinde geçirilen metbugat maslahatynda Türkmenistanyň içeri we daşary syýasatynyň esasy ugurlary ara alnyp maslahatlaşyldy

23-nji oktýabrda ýurdumyzyň Hytaý Halk Respublikasyndaky Ilçihanasynda Halk Maslahatynyň birinji mejlisiniň jemlerine we Türkmenistanyň Prezidenti Gurbanguly Berdimuhamedowyň BMG-nyň Baş Assambleýasynyň 73-nji maslahatynyň münberinden beýan eden Türkmenistanyň ileri tutýan ugurlaryna bagyşlanan metbugat maslahaty geçirildi.

Duşuşyga Pekinde ýerleşýän diplomatik wekilhanalaryň, HHR-yň ylmy, jemgyýetçilik we işewürler toparlarynyň, köpçülikleýin habar beriş serişdeleriniň wekilleri gatnaşdylar.

Ýygnananlaryň öňünde ilçi Çynar Rüstemowa çykyş edip, maslahata gatnaşanlary Türkmenistanyň Prezidentiniň başlyklyk etmeginde geçirilen Halk Maslahatynyň jemleri bilen tanyşdyrdy, onda durmuş-ykdysady we jemgyýetçilik-syýasy ösüşe, oba hojalyk pudagynda özgertmeleri kämilleşdirmäge, tebigy serişdelerden rejeli peýdalanmaga gönükdirilen konseptual çözgütler kabul edildi.

Türkmenistanyň Prezidenti Gurbanguly Berdimuhamedowyň BMG-nyň Baş Assambleýasynyň 73-nji maslahatynyň münberinden beýan eden parahatçylygy we howpsuzlygy üpjün etmek, wehimlere we howplara garşy durmak, Durnukly ösüş maksatlaryna ýetmek, daşky gurşawy goramak ýaly ählumumy we sebit meseleleri babatda Türkmenistanyň ileri tutýan ugurlaryna aýratyn üns berildi.

Türkmen Lideriniň ählumumy ösüşiň we durnuklylygyň bähbitlerine laýyk gelýän halkara hyzmatdaşlygyny işjeňleşdirmäge gönükdirilen oňyn başlangyçlary, hususan-da 2019-njy ýyly Parahatçylyk we Abadançylyk ýyly diýip yglan etmek hakynda, şeýle hem Aral deňziniň sebiti üçin BMG-nyň Ýörüte maksatnamasyny işläp taýýarlamak baradaky teklibi maslahata gatnaşanlarda uly gyzyklanma döretdi.

Maslahatyň çäklerinde şeýle hem türkmen-hytaý gatnaşyklarynyň wajyp ugurlaryna, syýasy, söwda-ykdysady, ynsanperwer we medeni ulgamlarda onuň geljegi barada pikir alşyldy.